काठमाडौं / नेकपा एमालेले हालै सम्पन्न प्रतिनिधिसभा र प्रदेशसभा निर्वाचनमा पार्टीविरोधी गतिविधिमा संलग्न घनश्याम भुसाल, प्रभु साहसहितका नेताहरुलाई पार्टीको साधारण सदस्य समेत नरहने गरी कारवाही गरेको छ ।
शनिबार पार्टी केन्द्रिय कार्यालय च्यासलमा बसेको सचिवालय बैठकले निर्वाचनमा पार्टी विरोधी गतिविधिमा लागेका नेताद्वय भुसाल र साहलाई पार्टी स्थायी कमिटी सदस्य नरहने गरी कारबाही गर्ने निर्णय गरेको हो ।
पार्टीका उपमहासचिव एवम् प्रचार विभाग प्रमुख पृथ्वीसुब्बा गुरुङका अनुसार बैठकले केन्द्रिय कमिटीका सदस्यहरु उपेन्द्र साह, कुन्दन कुशवाह, रामप्रित राम, बद्री न्यौपाने, रिता साह, गंगा चौधरी र टेकबहादुर बलाम्पाकीलाई पनि केन्द्रिय सदस्य नरहने गरी कारबाही गरेको छ।
एमालेले चुनावमा पार्टी विरोधी गतिविधिमा संलग्न भएको भन्दै पार्टीको केन्द्रिय निकायमा रहेका वाङ्दे शेर्पा, खेम सुवेदी, भक्तबहादुर अधिकारी, लक्ष्मी साहलाई पनि पार्टीको जिम्मेवारीबाट हटाएको छ । त्यसैगरी चुनावमा पार्टी विरोधी गतिविधिमा लागेको आरोपमा जैतुन खातुनलाई प्रतिनिधिसभाको समानुपातिकतर्फको सूचिबाट हटाइएको छ ।
उनले भने, ‘गएको चुनावमा पार्टीको विरुद्धमा लागेका, पार्टी परित्याग गरेका व्यक्तिहरुलाई पनि पार्टीबाट हटाउने निर्णय गरेका छौं । केन्द्रिय कमिटीका सदस्यहरु उपेन्द्र साह रौतहट, कुन्दन कुशवाह रौतहट, रामप्रित राम सिरहा, बद्री न्यौपाने, सर्लाही, रिता साह सर्लाही, गंगा चौंधरी दाङ, टेकबहादुर बलम्पाटी महोत्तरी उहाँहरुलाई हामीले पार्टीको केन्द्रिय कमिटीबाट हटाएका छौं । वाङदे शेर्पा ताप्लेजुङ, सल्लाहकार परिषद सदस्य, खेम सुवेदी कन्चनपुर, भक्तबहादुर अधिकारी कन्चनपुर, लक्ष्मी साह कैलाली उहाँहरुलाई पनि पार्टीबाट कार्वाही गरेका छौं । समानुपातिक सूचिमा रहेका तर पार्टी गतिविधिमा लागेका जैतुन खातुनलाई पनि कारबाही गरिएको छ ।’
एमालेले निर्वाचन विरोधी गतिविधिमा लागेका अन्य तहका नेताहरुलाई पनि कारबाही गर्ने तयारी गरिरहेको बताइएको छ ।